虛假謀殺案（下）
上集：https://bit.ly/35Ifdz6
小花將隨身物品丟落地下，掃埋一角。
然後我將隻手擺喺小花條頸上：「假設我捏住你條頸，你會掙扎，會抓我塊臉。」
「真係抓損你？」小花問。
我點頭：「冇傷痕邊似真。」
小花抓破咗我塊臉同條頸，留低幾道傷痕。
佈置好之後，我仲將電視遙控器擺喺當眼位置，令老公記得睇閉路電視。
小花匿埋喺雜物房，我就拖住喼出咗門口。
做戲做全套，我揸車去到一個荒僻嘅海邊，然後開始等。
唔知等咗幾耐，老公打電話畀我，把聲有啲震：「老婆，你……你喺邊啊？」
我努力扮出哭腔：「我……我做緊啲嘢，唔返嚟住啦。」
「你做緊……咁你慢慢啦，小心啲。」老公好慌張咁收咗線。
如我所料，佢真係一個懦弱嘅男人，連我係咪殺咗人，佢都唔敢問。
我喺海邊坐咗一晚，第朝清晨先返屋企。
老公對黑眼圈好深，個人好攰好憔悴，佢一定係諗我殺人嘅事，諗咗成晚。
我主動捉住老公隻手：「我哋一齊落去食早餐，跟住返工啦。」
「吓，仲返工？」老公嚇咗一跳。
梗係啦，我要帶老公出門，阿花先可以離開呢間屋。
我就話：「生活總要繼續。」就算殺咗人，都要維持正常生活，先冇咁易俾人發現破綻。
老公嘴唇一震，點點頭：「係嘅。」
老公返工後，我返屋企一睇，阿花已經走咗。
而且，尋日留低嘅血跡、阿花嘅隨身物品都已經俾老公清理好，睇嚟佢真係好唔想面對「我殺咗人」呢件事。
過幾日，我就提出離婚，老公爽快應承，仲同所有親友講，係我哋雙方都同意離婚。
呵呵，我心中冷笑，呢個男人果然懦弱，一知道我殺咗人，就急不及待咁同我劃清界線。
我即刻搬出去，一路分居，一路搞離婚手續。
但好快，警察就上門拘捕咗我，話我涉嫌謀殺阿花。
我心中一涼，原來老公唔止懦弱，仲咁薄情，我哋已經搞緊離婚，佢仲會去舉報我。
「係我前夫誣衊我，我從來都冇殺過人，我可以叫阿花嚟。」我馬上打電話畀阿花，可惜電話打唔通。
其實做完戲之後，我都打過畀阿花，不過都係打唔通。
我同警察講：「阿花嘅電話可能壞咗，或者你哋上門搵佢？」
警察皺眉：「我哋已經搵到阿花嘅屍體。」
一張張可怕嘅相擺喺我面前，真係阿花，變成屍體嘅阿花。
老公慌張地出現，話阿花係佢殺嘅。
「嗰日我返到屋企見到血跡，睇埋閉路電視，我知道你帶咗阿花返屋企，殺咗佢。」
老公同我講：「我想幫你清理乾淨，打掃嗰陣，我喺雜物房見到阿花，佢仲有呼吸，應該係假死。」
乜嘢假死，阿花分明係等得太耐，喺雜物房瞓著咗。
我好驚咁問：「咁你點做？」
老公嘆氣：「等阿花醒番，佢一定會告你殺人。所以我一刀斬甩咗佢個頭，連夜運條屍去郊外埋咗佢，點知都係被發現咗……」
「你斬甩佢個頭？你連老鼠都驚，你點會殺人？」我呆咗。
老公好認真咁答：「我嗰吓好驚，好驚你會有事，好驚你會坐監。」
所以，懦弱嘅男人用盡一生嘅勇氣，將假謀殺變成真謀殺。
老公想承擔所有罪行，但閉路電視嘅記錄表明，阿花係跟咗我入屋，冇再出過嚟。
然後，我拖住一個大喼出去，我臉上仲有阿花嘅抓痕。
當然，老公夜晚都拖過喼出去，去過棄屍嘅地點。
所以「證據」顯示，係我同老公一齊殺咗阿花。
事到如今，我將真相講晒出嚟，但冇人信我。
所有人都相信證據，覺得我只係為咗脫罪，夾硬作故仔。
我真係好憎我老公，如果唔係佢多事，我駛乜搞成咁？
原來，我憎嘅唔係懦弱嘅男人，而係我老公本身。
我憎佢，所以佢懦弱時我憎佢，佢為咗保護我而殺人，我更憎佢。
愛同恨，好多時都係先有態度，再有原因。
—完—
將專頁設定為「搶先看」/ "See first"，最新故仔馬上睇！
新書《筍工重生高科技》已經出版了，現正發售中，
詳情可點擊這裡：https://bit.ly/32hgoSN
你的支持是我最大的動力！
#短故 #短篇 #小說 #陳美濤 #廣東話 #粵語 #tomatochan #虛假謀殺案
Search